Tit 2 | BOJ | STEP | Ariya Taitus, ni na tamo uŋgasari naŋgi anjam endegsim minjroqne, “Niŋgi Qotei aqa anjam kalil geregere dauryosib kumbra bole bole yoqniye.”

Titus 2

Tamo qeli naŋgi Qotei aqa kumbra bole segi dauryoqnebe

1 Ariya Taitus, ni na tamo uŋgasari naŋgi anjam endegsim minjroqne, “Niŋgi Qotei aqa anjam kalil geregere dauryosib kumbra bole bole yoqniye.” 2 Osim tamo qeli naŋgi anjam endegsim minjroqne, “Niŋgi ya uysib nanarioqnaib. Nuŋgo kumbra geregere taqatoqnsib kumbra bole yqajqa are qaloqnsib areqalo bole dauryoqniye. Osib Qotei aqa anjam bole geregere qalieosib tamo uŋgasari naŋgi qalaqalainjroqniye. Osib gulube kalil qoboiyosib siŋgila na tigelesoqniye.” O Taitus, ni na tamo qeli naŋgi anjam degsim minjroqne.

3 Ariya ni na uŋa qeli naŋgi anjam endegsim minjroqne, “Kumbra bole kalil Qotei a areareteqnu qaji di niŋgi dauryosib soqniye. Niŋgi yomuoqnaib. Wain uyoqnsib nanarioqnaib. Niŋgi na Kristen was naŋgi kumbra bole osornjroqniye. 4 Osib uŋa meli naŋgi minjribqa naŋgi naŋgo tamo ti naŋgo aŋgro ti qala-qalainjroqnqab. 5 Qalaqalainjroqnsib naŋgo areqalo geregere taqatosib Qotei aqa ŋamgalaq di une saiqoji sqab. Sosib naŋgo tal ti naŋgo iŋgi iŋgi ti geregere taqatosib naŋgo tamo ti naŋgo aŋgro ti naŋgi dego geregereinjroqnqab. Osib naŋgo tamo naŋgo sorgomq di geregere sosib naŋgo anjam dauryoqnqab. Naŋgi kumbra bole degsib yoqnibqa naŋgo tamo naŋgi na naŋgo kumbra di unoqnsib Qotei aqa anjam qa yomuoqnqasai.” O Taitus, ni na uŋa qeli naŋgi anjam degsim minjroqnime.

Taitus a kumbra bole segi yoqnim aŋgro meli naŋgi aqa kumbra di unsib dauryoqnqab

6 Ariya ni na aŋgro meli naŋgi dego are tigeltetnjroqnimqa naŋgi naŋgo kumbra geregere taqatoqnebe. 7 O Taitus, ni kumbra bei yqa osimqa kumbra bole segi yoqne. Yimqa aŋgro meli naŋgi ino kumbra di unsib dauryoqnqab. Ariya ni gisaŋ anjam maroqnaim. Ni anjam palontqa osimqa anjam bole segi palontoqne. Alaŋ anjam koba maroqnaim. Diqaim. Gaigai kumbra bole segi yoqnsim anjam bole palontoqne. 8 Ni anjam bole segi tamo naŋgi minjroqnimqa naŋgi ino anjam di qusib uge qa marqa keresai. Jeu tamo naŋgi dego ino anjam di qusib deqa iga yomuigwa keresai. Naŋgi naŋgo segi areqalo uge qa jemainjrqas.

Kaŋgal tamo naŋgi naŋgo wau qa gate naŋgo sorgomq di geregere sosib wau bole yoqnebe

9 Ariya Taitus, ni na kaŋgal tamo naŋgi anjam endegsim minjroqne, “Niŋgi gaigai nuŋgo wau qa gate naŋgo sorgomq di sosib wau bole bole naŋgi arearetnjreqnu qaji di yoqniye. Niŋgi nuŋgo wau qa gate naŋgo medabu ojoqnaib. 10 Naŋgo iŋgi bei bajiŋaib. Naŋgo anjam geregere dauryosib naŋgoq di kumbra bole yoqniye. Yimqa wau qa gate naŋgi nuŋgo kumbra di unsib areboleboleinjrqas. Deqa niŋgi kumbra bole bole yoqnibqa nuŋgo wau qa gate naŋgi unoqnsib Qotei agi iga eleŋej qaji aqa anjam quoqnsib maroqnqab, ‘Di anjam bole.’” O Taitus, Qotei aqa anjam di agi iga palonteqnum. Deqa ni na kaŋgal tamo naŋgi anjam degsim minjroqne.

Iga Qotei aqa kumbra dauryoqnsimqa Kristus aqa bati qa tariŋoqnsim sqom

11 Iga qalie, Qotei a iga qa are tulaŋ boleiyeqnu. Aqa kumbra di a na boleq atsiq iga osorgej. Deqa a na tamo uŋgasari kalil naŋgi eleŋqa kere. 12 Qotei a iga qa are tulaŋ boleiyeqnu aqa kumbra dena iga endegsi osorgeqnu. Iga Qotei qoreiyqajqa kumbra torei uratqom. Osim mandam endeqaji areqalo uge uge dego uratosim areqalo bole ti sosim kumbra bole segi dauryoqnqom. Bole, iga mandam tamo uŋgasari naŋgo ambleq endi unum. Ariya Qotei a iga qa are boleiyeqnu aqa kumbra dena iga endegsi osorgeqnu. Iga Qotei aqa kumbra segi dauryoqnqom. 13 Osim iŋgi tulaŋ boledamu iga mondoŋ oqom qaji di unqajqa areboleboleigoqnimqa tariŋoqnsim sqom. Yesus Kristus a segi Qotei. A siŋgila koba. A na iga eleŋej. Mondoŋ a wala bole ti riaŋ koba ti Qotei aqa siŋgila ti di osim laŋ qureq dena bqas. Iga di unqajqa tariŋoqnsim unum. 14 Kristus a na iga eleŋosim gago une kalil kobotqajqa deqa marsiq aqa segi ŋambile uratosiq moiej. Iga aqa segi tamo uŋgasari boledamu sosim kumbra bole bole siŋgila na dauryoqnqajqa deqa marsiq aqa segi ŋambile uratej.

15 O Taitus, ni gaigai tamo uŋgasari naŋgi anjam di minjroqnimqa naŋgi qusib dauryoqnqab. Tamo uŋgasari anjam gotraŋyeqnub qaji naŋgi dego siŋgila na minjroqnimqa naŋgi kumbra uge uratoqnqab. Tamo bei na ino anjam di uge qa maraiq.